تعلم كيف تكتب قصيده

[**أحساس جده**]

بسم الله الرحمن الرحيم


نظرت إلي بعض الكتابات حول نظم القصيده
وجدت انه بالاضافه إلى الأخطاء العديده في هذه المواضيع
أنها تتسم بالتعقيد للشاعر المتمكن قبل المبتدئ او من لديه رغبة لتعلم النظم

وبعد الاستعانه بالله

سأبدأ هنا سلسله مواضيع بعنوان

((تعلم الشعر بسهوله))

وهي اجتهاد شخصي بحت ابتعدت فيه قدر الامكان عن التعقيد
وابتكرت بعض الامور وكتبت أبيات وقصائد خصيصا لتوضيح بعض النقاط فيه

وستكون مواضيعنا كالآتي :

- كيف تكتب القصيده ؟؟ - ضوابط مهمه للكتابه - خطوات عمليه لكتابه القصيدة
- الفكره والقصيده - ماهي القافيه ؟! - المفرده واهميتها - الوزن بشكل صحيح

هذه السلسله موجهه لمن لديه رغبه حقيقيه ليتعلم نظم القصيده المقفاه الموزونه
وكذلك سيجد من يجيد الوزن والقافيه مايفيده ولن أطيل أكثر بالمقدمه
وأرجو ألايبخل أحد بملاحظاته أوتساؤلاته كيف ماكانت

وباسم الله نبدأ

الموضوع الأول (وهو مدخل لباقي المواضيع )


كيف تكتب الشعر؟؟؟


تحتاج الي:

1- فكره

2- مفرده (حاول تكون المفردات اللي تستخدمها سهله ومفهومه ولاتعقد الامور)

3- قافيه ( لاتفكر فيها في البدايه راح تجي بروحها بس بعد البيت الاول التزم علي الاقل بالحرفين الاخيرين )

4- وزن ( لاتحاتي )


الخطوات:

1- اختر الفكره:
مثال :
( ابي اكتب للمنتدي ومولاقي كلام اقوله)
شلون اصيغ هالفكره ؟!؟!؟؟!؟!
اسال نفسي سوال شنو ممكن اقول؟!؟!
شلون ابدا ؟!؟!؟!
وشنو القافيه اللي اختارها ؟!؟!؟

- اجاوب
اول شي انسا مساله القافيه راح تجي بروحها
اهم شي فكر باللي ممكن تقوله حتا الوزن انساه
وعبر عن اللي بخاطرك !!!!
شلون ؟؟؟!
انت ودك تكتب للمنتدي بس مو لاقي كلام تقوله
قول مثلا :
ودي اكتب لي كلام ومالقيت اللي اقوله ؟؟!؟!!!
بدايه لشطر بيت حاول تكمله بنفسك
المطلوب انك تسترسل بالكتابه بس
لاتنظر للوزن في البدايه
الوزن راح يظبط مع الممارسه
بس شلون اظبطه من غير تعقيد او التزام بالتفعيله وبحور الشعر مثل



فاعلاتن مستفعلن فاعلاتن
او
فعلن فعلن فعلن فعل

وهلم جره

الاجابه سهله
في البدايه حاول تغنيها واذا جت بالغناء سهله وسلسه
فهي اقرب انها تكون موزونه

وحاول باغاني مثل :

لمني في محجر عيونك لراشد الماجد
او حبيبتي وحيات قلبك وعينك لاحلام وميحد حمد

او اسمحيلي يالغرام لمحمد عبده
او تناسيني بنفس الموعد اللي به ذكرتيني لمحمد عبده

وانا اخترت هالاغاني بالذات لان كل وحده فيهم تخدم وزن معين

ومو بالظروره هالاغاني

الاغنيه اللي تبيها
المهم شيلها بطاروق تفضله وترتاحله


بالنسبه للقافيه
حاول تكون نهايه البيت من حرفين او اكثر


مثال 2 :

(ودي اكتب قصيده في حب الوطن الكويت )

شلون اصيغها ؟!؟!

انت تحب الوطن؟!؟!
قول مثلا

ودي اكتب لك قصيدة حب ياكويت وماقدرت اكتب
،،،،،،،،،،،،،،،،،،،،،،لقيت اصعب مواضيع الهوي كلمات فـي حقـك


لاحظ ان الشطر الاول مو موزون حاول اتغنيها

حاول اتغنيها بنفس لحن تناسيني لمحمد عبده
تناسيني بنفس الموعد اللي به ذكرتيني .............
ماراح تغنيها بسهوله
حاول تصلحها

ابي اكتب قصيدة حب ياكويت وعجزت اكتب
،،،،،،،،،،،،،،،،،،لقيت اصعب مواضيع الهوي كلمات في حقك

حاول تغنيها وراح تمشي معاك ميه بالميه

او ممكن اقول :

احبك ياكويت العز ياتاج الفخر والطيـب
،،،،،،،،،،،،،،،،احبك وارخص الغالي وابيع الروح لترابك


وعلي هالمنوال كمل

ولاحظ انك في البدايه ما اخترت قافيه
لكن هالقافيه راح تلتزم فيها بالابيات اللي راح تكتبها بعدين

ملخص الكلام
اختار الفكره واكتبها بطريقتك باي شكل كان
وكمل القصيده كامله مع الالتزام بالقافيه
وفي الاخر حاول توزنها مثل ماوضحت في البدايه
بس

ما ادري اذا كان كلامي مفيد او لا
لاكنه محاوله مني ارجو انها تكون مفيده
واي شي انا بالخدمه
تحياتي

وللموضوع بقايا

ــــــــــــــــــ



الموضوع (2) على هذا الرابط :
ضوابط مهمه للكتابة
http://vb.ozq8.com/showthread.php?t=384540

الموضوع (3) على هذا الرابط :
خطوات عمليه لكتابة القصيدة
http://vb.ozq8.com/showthread.php?t=436487

الموضوع (4) على هذا الرابط :
الفكرة والقصيدة
http://vb.ozq8.com/showthread.php?t=487950

الموضوع (5) على هذا الرابط :
ماهي القافيه ؟!
http://vb.ozq8.com/showthread.php?t=548465

الموضوع (6) على هذا الرابط :
المفردة و أهميتها
http://vb.ozq8.com/showthread.php?t=548467

الموضوع (7) على هذا الرابط :
الوزن بشكل صحيح
http://vb.ozq8.com/showthread.php?t=560953



منقوووووووول للفااااااااااائده

[غالي الاثمان]

الله الله موضوع رائع ويستاهل التثبيت للفاااااااااااااائد مشكور اخوي احساس جده

[SALEH]

بدايه جميله .. ( ومشاركه قيمه ..!


يعطيك العافيه ..


آنتظر مشاركاتك القادمه ..


سلام ،،

[جهنيه وكلي فخر]

مشكور اخوي احساس جدة موضوع في قمه الروعه

ولكن حسب ظني ان الشعر موهبه من الله يعني ممكن

البدوي اللي ماقراء ولاكتب يقول شعر وياالف بيوت شعريه ,,تقبل تحيااااااتي

[عبداللطيف]

تسلم اخوووووووووووووى على الموضوع الرائع