أنا الصيني كريم العنصرين
أنفقت أمريكا المليارات حتى تحتل العراق و قٌتل الألاف من جنود المارينز و ملايين العراقيين ولم يكسب احد اى شىء من هذا الاحتلال بكل ما فيه من غباء، الصين وحدها تمارس الاحتلال دون ان تخسر مليما واحدا ودون ان تريق نقطة دم واحده بالعكس ( او على رأى اللمبى ابسليوتلى) تكسب الصين احترام و اعجاب العالم كله و تكسب مليارات يوميا بفعل هذا الاحتلال و يمكنك ان ترى ذلك فى مصر بمنتهى الوضوح، فقد استطاعت الصين ان تحتل مصر بمنتهى الذكاء ، فى البداية احتلتنا الصين بالمنتجات حيث لا يخلو بيت مصرى الان من 20 منتج صينى على الاقل وعد معايا:
1- طقم الصينى أصلا.
2- طقم التوابل البلاستيك و السكاكين و الأطباق.
3- الخلاط و مضرب النسكافيه و الميكرويف و التوستر و الشفاط بالمره.
4- المحفظه وحقائب السفر والحقائب الرياضيه بعض أنواع الورنيش واسبراى التنظيف واللكلك و القفازات .
5- الشاى الاخضر و اعشاب الجنسنج و الثوم الصينى اللى استوردناه فى ازمة الثوم من شهرين والفول المدمس حسب تقرير منشور فى جريدة الدستور يقول ان مصر تستورد 65% من احتياجاتها من الفول المدمس من الصين و قريبا سترى عربيات الفول اللى فى الشارع شغالة بالكهرباء وعليها عيال صينين بيغرفولك!
6- الريموت كنترول وشاحن الموبايل و مشترك الكهرباء العادى وابو سلك طويل.
7- الـ dvd و مروحة السقف و ماكينة الخياطة وترابيزة المكواه و المكواة نفسها.
8- براويز الصور و الأباجورة و بعض قطع الديكور.
9- عدة التليفون الارضى وجهاز إظهار رقم الطالب و الأنتركم و الووكى توكى.
10- اللمبات اللى فى كل حته فى البيت بمختلف الوانها ومقاساتها و انواعها.
11- ماكينة الحلاقه الكهربائيه و ماكينة قص شعر الأنف و الأذن و ماكينة إزالة شعر الساقين (بالنسبة للستات طبعا).
12- ملحقات الكمبيوتر (الطابعه..وورق الطابعة..الكى بورد..الفلاشه..السى دهات)..ده لو ماكانش الكمبيوتر نفسه صينى.
13- الهاى فاى وكاميرا الفيديو و الكاميرا الديجيتال و الكاميرا العادية و كاميرا الميه.
14- الشباشب والسابوهات وبعض انواع الاحذيه الرياضية المضروبه من اللى بتطلع ريحة جثث بعد 3 لبسات و لازم تقلعها فى البلكونه اول ما توصل البيت.
15- سجادة الصلاه و السبحه وفوانيس رمضان بأغانى نانسى أو بأغانى محمد رشدى (رمضان رمضان والله بعوده يا رمضان....أموت و اعرف الصينين بيحسوا بأيه لما بيسمعوا محمد رشدى).
16- ساعة الحائط والمنبه اللى بصوت الآذان.
17- الاكسسوارات الحريمى والنظارات الشمسيه واطارات النظارات الطبيه ونظارات القراءة أم عشرين جنيه.
18- الدباديب بتاعة الحبيبه و الشموع و القلوب القطيفة و الميداليات.
19- لعب الاطفال بكل أنواعها ، مش اللعب بس كمان الأدوات المدرسية ( اقلام وبرايات و اساتيك و شنط المدرسه..الخ)
20- العربيات الصينى بكل مستلزماتها ،ولو ماعندكش عربيه يبقى موتوسيكل صينى ولو ماكنش موتوسيكل يبقى عجلة، ولو ماكانتش عجله يبقى تك تك، ولو ماكنش تك تك يبقى سكوتر و هذا اضعف الايمان.
احتلت الصين مصر بدون طلقة مدفع او نقطة دم واحده وهى اول محتل نقع فى غرامه ونستسلم له بكل هذا الحب و التشجيع ، لم ترسل الصين جيوشا و لكنها ارسلت المعدات، وصلت المعدات ثم بدأ الصينيون أنفسهم فى التسلل الى البلد بهدوء و من غير شوشرة و الدليل احصائية حديثة منشورة فى الاهرام تقول ان هناك 49 حالة زواج بين المصريات و الرجال الصينين....و السؤال هل الزوج الصينى بنفس جودة و كفاءة المنتجات الصينية؟ يعنى هل زيه زى بقية الحاجات الصينى كبيرها شهرين و بعدين بتهنج؟
صفحة جديدة 2
